【何謂自用乾瑤柱？】

去到海味鋪買乾瑤柱，客人最常問：「自己食普普通通就夠，邊一款好？」
其實自用，都可以有要求，食落自己個肚，點解唔可以揀好一點？

如果真係要細分，都可以俾個貼士大家，如果純粹煲湯、煲粥用，只求湯、粥有乾瑤柱味，而不會食乾瑤柱湯渣，S（細碼）、SA（加細碼）或SAS（加加細碼）乾瑤柱都適合，這三種size都提供到乾瑤柱應有的鮮甜，但由於貝柱較細，經過長時間加熱烹調，自然會變得韌同嚡口，所以只要味道而不食渣，以上三個size便已經足夠。假如連渣都食，便會建議買大size的如M（中碼）或L（大碼），貝柱較耐火，煲完仍然軟滑。

如果會煮柱甫、釀節瓜，便要用到M或以上size才足夠。

理論上，乾瑤柱愈大粒愈鮮甜，只需用鼻子聞一聞各種大小乾瑤柱的味道已經分辨得到，不過去到LL（加大碼）、GL（加加大），身型龐大如棋子餅，不過因為鮮貝已經過老，做成乾瑤柱反而食用上不及L或M，所以多年來，老買手都只集中搜購L、M乾瑤柱，只有經濟極佳的年份，才會入手LL乾瑤柱，用來給客人做送禮，就非常適合。但我們始終認為，送海味給親朋好友，應以最好味為前提，而非最好睇，所謂「最好睇」，都是用來騙國內遊客的，去遊客區參茸店看看那些「龐然大物」就知一二。

購買乾瑤柱前，客人可以做的小功課：
1. 日本北海道乾瑤柱除了以大小作區別，也會以質量作等分，分為一等、二等、三等，一等乾瑤柱為最高質，同昌海味一直只入手一等乾瑤柱，二三等從不考慮，保證客人買到最靚貨。
2. 碎貝同原粒有何分別？日本水產公司會將生產過程中出現的碎乾瑤柱收集，再包裝出售。由於不同等別的碎貝都會收集在一起，所以碎乾瑤柱並不代表是從一級乾瑤柱碎裂出來，原粒質素一定比碎為佳。

===================================
【同昌海味 創於一九七一年】 http://tungcheong.blogspot.hk/
【地址】西營盤德輔道西149號地下，MTR西營盤站A2出口對面
【電話】25498100 【營業時間】0800-1730
【同昌海味手機App應用程式】
【Android手機下載同昌海味App：https://goo.gl/b5N6I3】
【蘋果iOS下載同昌海味App：https://goo.gl/Wh53WS】
===================================