【一個秤磅 一個故事】

每一間傳統海味鋪，一定有一個傳統秤磅，才算正宗。

這個秤磅，由1971年跟住同昌到現在，製造這個秤磅的師傅早幾年都已經退休結業，始終電子磅當道，無人接手加上時代巨輪的淘汰，難免有點唏噓。

睇磅可以「睇客」，暗藏不少故事。錙銖必較的顧客，睇到個磅實一實，「老闆秤先D呀！」甚麼叫秤先D？即係秤磅有兩邊，秤貨的一邊稍為重過秤砣的一邊就叫秤先D，顧客著數D，買得開心D。如果秤砣稍為重過貨，叫「秤慢D」，通常係老闆叫伙計「秤慢D」，因為咁樣老闆咪著數D囉。嚟同昌買嘢，幾時都係秤先D，所以客人經常Whatsapp讚：「斤両足！」

這些述語，從前在日常生活、街市攤販檔口經常聽到，只係今時今日用晒電子磅，一切都秤到剛剛好，半斤就是8.0両，一斤就是1.000斤，精準但欠了人情味，你哋覺唔覺？

唔單止情味，就連斤両應有的知識，都被混淆，香港傳統的重量單位叫「司馬斤」，一斤就是十六両，等如600克（每両37.5克），許冠傑都有首歌叫〈半斤八両〉，諷刺老闆對打工仔「出咗半斤力，幾難攞番足八両」！本來相安無事，不過大陸一樣有斤両，叫「市斤」，一斤得十両，等如500克（每両50克），結果中港溶合，司馬斤、市斤大混亂，你嘅斤唔同我嘅斤，有成100克出入。「半斤五両」，真係聽唔慣，邊夠半斤八両咁順口，對嗎？

呢個表，要記住：
香港：一斤 = 16両 = 600克 = 司馬斤制
大陸：一斤 = 10両 = 500克 = 市斤制

同昌海味係正宗香港人店鋪，梗係 ‪#‎半斤八両 啦！

亦因為我們夠傳統，有勞各位顧客要遷就一下我們，明天重陽節假期，照例休息一天，去拜山。對先人慎終追遠，是為孝，老買手話一日仲行得，春秋二祭都要拜山。

你們又會點過呢？